Намесніцу начальніка ідэалагічнай працы Мсціслаўскага райвыканкама прыцягнулі да дысцыплінарнай адказнасці. Яна не выканала рашэнне пра ўсталяванне памятнай дошкі беларускаму навукоўцу, педагогу, вязню сталінскіх лагераў Янку Бялькевічу (1883 — 1960), піша racyja.com.
Ініцыятарам усталявання памятнай дошкі на будынку былога Мсціслаўскага педтэхнікума (Бялькевіч з'яўляўся яго дырэктарам) быў краязнавец Уладзімір Кажамяка. Летась у лісце да яго чыноўнікі з райвыканкама паведамілі, што Мінкульт ухваліў праект. "Бліжэйшым часам будзе распрацаваны эскізны праект памятнай дошкі і ўзгоднены ў Магілёўскім абласным мастацка-экспертным савеце па манументальным і манументальна-дэкаратыўным мастацтве", — пісалі яны. Але прайшоў год і нічога выканана не было. Пасля чарговага звароту Кажамякі ў райвыканкаме знайшлі вінаватага ў "сабатажы".
Старшыня Мсціслаўскага райвыканкама Дзмітрый Пімашэнка абяцае, што памятная дошка, прысвечаная Янку Бялькевічу, сёлета будзе ўсталявана.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут