Антон Фурса / t.me/Grodno_grab
У Гродне амапаўцы затрымалі хлопца, які працуе ў Польшчы. Затрымліваць яго прыбылі байцы ў поўнай амуніцыі. Кадры затрымання з'явіліся ў адным з неафіцыйных тэлеграм-каналаў ГУБАЗіКа.
Затрыманага завуць Антон Фурса. У відэа на канале сілавікоў ён кажа, што часова працуе ў Польшчы. Пасля прыезду ў Беларусь яго затрымалі "за распаўсюд экстрэмісцкіх паведамленняў і розных даных".
Таксама хлопец кажа, што раней быў футбольным фанатам. Сілавікі нават дадалі фрагмент відэа, як Антон весяліцца з іншымі футбольнымі фанатамі. Відэа, як выглядае, было знятае некалькі гадоў таму.
Таксама сілавікі паведамляюць, што раней у адным з сваіх тг-каналаў публікавалі інфармацыю пра Фурсу і скрыншоты ягоных паведамленняў. Сам хлопец кажа, што ў свой час не надаў гэтаму значэння.
Па якой справе затрымалі Фурсу, невядома. Але згаданыя ягоныя паведамленні, як можна меркаваць па заявах сілавікоў, могуць быць падставай для крымінальнай справы.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут