Імя Юлі Юхнавец трапіла ў навіны пасля таго, як у судзе над лідарамі прафсаюза РЭП яна прызналася, што супрацоўнічала з КДБ. Таксама яна распавяла, як, працуючы сакратаркай, вазіла праз мяжу з Літвой грошы на выдаткі прафсаюза. Юля фатаграфавала іх і атрымлівала за гэта грошы ад сілавікоў.
Са старонкі Юліі Юхнавец “ВКонтакте” (цяпер ужо выдаленай) Еўрарадыё даведвалася, што яна нарадзілася 17 жніўня 1996 года ў Мінску. Па словах знаёмых, сям'я Юліі не з заможных. Маці працуе ў Беларускім дзяржаўным аграрна-тэхнічным універсітэце. Звестак пра бацьку знайсці не атрымалася.
У 2011 годзе Юлія паступіла вучыцца на сакратарку ў Мінскі дзяржаўны каледж электронікі. У гэтай установы добрыя стасункі з прафсаюзам РЭП. Таму менавіта туды кіраўнік прафсаюза Генадзь Фядыніч звярнуўся, калі яму спатрэбіўся сакратар. У каледжы парэкамендавалі Юлію.
Аднагрупнікі дзяўчыны распавядаюць Еўрарадыё, што тады яна была спагадлівай, таварыскай. Але Юлія спыніла камунікацыі з большасцю тых, з кім вучылася.
"Яна была вельмі цікавым чалавекам, любіла фатаграфавацца. На жаль, ужо больш за год з ёй не маю зносіны, — распавядае яе аднагрупніца Лера. — Яна вельмі любіла танчыць. Была таварыскай, чуллівай. Нічога дрэннага сказаць пра яе не магу".
У 2013 годзе Юлія Юхнавец атрымала ў каледжы тытул “Міс Вясна”.
"Я пазнаёмілася з Юляй падчас вучобы ў каледжы. Апошнім разам мы бачыліся мінулым летам, з тых часоў не камунікавалі. Яна мне заўсёды здавалася добрым і чулым чалавекам. Я нічога не ведала пра яе працу ў прафсаюзе. Чаму яна ўвязалася ў гэтую авантуру? Думаю што за прафсаюзамі заўсёды ідзе паляванне, і КДБ трэба было знайсці інфармацыю. Мабыць, яе прэсавалі, запалохвалі", — дзеліцца ўражаннямі Аня, якая вучылася з Юліяй Юхнавец у каледжы.
У сярэдзіне 2010-х Юлія далучылася да дабрачыннай грамадскай арганізацыі "Свет без межаў", якая займаецца дапамогай дзецям:
"Мы з Юліяй мала знаёмыя, — распавядае супрацоўніца "Свету без межаў", якая была ў яе ў сябрах у сацсетках. — Яна падала заяўку на валанцёрства ў нашу арганізацыю. Была на мерапрыемствах пару разоў, але актыўнага ўдзелу не прымала. Даўно, дарэчы, яе не было".
Яшчэ адна дзяўчына (прозвішча ёсць у рэдакцыі) пазнаёмілася з Юляй Юхнавец падчас практыкі ў тэатральнай студыі.
"Пазнаёміліся мы з ёй у тэатральнай студыі ў 2015 годзе. Яна туды прыйшла разам з сябрам з прозвішчам В. (прозвішча ёсць у рэдакцыі). Яны любілі патусіць з багемнай моладдзю. Сама яна любіла выглядаць як "залатая моладзь", хоць зусім незразумела было, за якія грошы яна падтрымлівала гэты вобраз. Наколькі я ведаю, яна не вельмі шмат атрымлівала. Пры гэтым у яе былі раскошныя рэчы: сумкі Chanel, дарагія футры, упрыгажэнні з брыльянтамі. Цяпер зразумела, адкуль у яе былі грошы на такі стыль жыцця".
Юхнавец і В. любілі правакаваць тэатралаў размовамі пра палітыку і беззаконне чыноўнікаў: пачыналі размовы пра Лукашэнку, пра чыноўнікаў з Драздоў, пра бязмежжа ўладаў.
"В. любіў ладзіць публічныя размовы, дазваляючы сабе шмат рэзкіх выказванняў. Юля ж любіла пагутарыць асабіста, усё выпытвала, дзе я вучуся, чым займаюся, ці працую дзесьці, куды я паступаць збіраюся, чаму я не хачу паступаць за мяжу. Навошта ёй было ўсё гэта? Мы з ёй былі толькі знаёмыя. Сама казала ці што недзе за мяжой вучылася, ці што ў нейкім прыватным ВНУ. Любіла выстаўляць сябе дысідэнткай".
Раз-пораз Юлія знікала. З ёй не было магчымасьці звязацца, акаўнты ў сацсетках маўчалі. А калі яна чарговы раз з’яўлялася ў жыцці суразмоўцы Еўрарадыё, дык заўсёды прыносіла авантурныя прапановы паўдзельнічаць у сумніўных справах:
"Раптам з'яўлялася. З вельмі дзіўнымі прапановамі. Напрыклад, яна ўвесь час мяне агітавала ўступіць у крыптавалютную фінансавую піраміду "МаксіРайз" [скончыла сваё існаванне ў напачатку 2018 года. — Еўрарадыё]. Потым яна прызналася, што працавала ў ёй і падобных кампаніях рэкруцёрам.
Я ў яе пыталася, навошта яна туды лезе, там жа ашуканцы. У мяне інфармацыя ад сваякоў з МУС была. А яна мне тады адказала: "У мяне інфарматары круцейшыя за тваіх". Я тады не звярнула на гэтыя словы ніякай увагі. Атрымліваецца, яна збірала інфармацыю на ўсіх сваіх працах. Змяя падкалодная... Хоць і разумею, што маглі быць розныя абставіны, якія б маглі яе схіліць да такога супрацоўніцтва, але ж не разумею яе".
Юлія Юхнавец прапаноўвала суразмоўніцы Еўрарадыё працаўладкавацца ў прафсаюз РЭП. Але дзяўчына адмовілася:
"[Юлія] распавядала, што праца няпыльная, ёсць паездкі за мяжу. Але я не адважылася з гэтым усім звязвацца. І прыкладна ў той жа час яна сама адтуль сышла, гэта было недзе ў 2016 годзе. Яна знікла, і тады ж пачалі з'яўляцца нейкія праблемы і чуткі пра гэты прафсаюз. Я тады яшчэ парадавалася, што не пагадзілася на яе прапанову".
Пасля гэтага Юля канчаткова знікла. Змяніла нумары тэлефонаў. Памяняла акаўнты ў сацсетках. Нашая суразмоўца больш не мела зносінаў з ёю. Пра сваю былую сяброўку яна даведалася з навінаў пра суд над кіраўнікамі прафсаюза РЭП.