У Албаніі ў ноч на 26 лістапада адбыўся землятрус магнітудай у 6,4 бала. Ахвярамі стыхіі сталі не менш за чатыры чалавекі, траўмы атрымалі яшчэ 150, перадае Радыё "Свабода".
Геалагічная служба ЗША ўдакладніла, што эпіцэнтр землятрусу быў у 30 км ад сталіцы краіны — Тыраны. Крыніца штуршкоў размяшчалася на глыбіні 20 км. Пасля асноўных штуршкоў адбыліся яшчэ некалькі — афтэршокі. Пры гэтым адзін з іх дасягаў магнітуды ў 5,3 бала.
Землятрус разбурыў прынамсі тры шматкватэрныя дамы і станцыю электраразмеркаваньня ў Тумані, а таксама рэстарацыю ў Дурэсі.
Дарэчы, у верасні ў Албаніі ўжо адбыўся землятрус, які называлі наймацнейшым за 30 гадоў. Аднак ён быў меншы за цяперашні — тады штуршкі былі магнітудай толькі ў 5,6–6 балаў. Загінулых у той раз не было, пацярпелі ад стыхіі каля 100 чалавек.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.