Менш чым за тыдзень скрыжаванне вуліц Рэвалюцыйная і Камсамольская ў Мінску затапіла двойчы. 17 ліпеня сіноптыкі абяцаюць новыя залевы, у Беларусі абвешчаны аранжавы ўзровень небяспекі. А ўладальнікі бараў і салонаў у самым цэнтры сталіцы, замест таго каб займацца кліентамі, шукаюць, дзе набыць мяшкі з пяском, і будуюць сапраўдныя барыкады, каб уратавацца ад новага патопу.
Кавярню "Закон бутерброда" першы раз затапіла ў пятніцу, 13 ліпеня. Па словах прадстаўніка ўстановы, у іх і раней былі невялікія праблемы падчас моцных залеваў, але такое — упершыню: "У пятніцу мы зразумелі, што раней нас і не патапляла. Вады было па шчыкалатку ва ўсіх памяшканнях. На ўваходзе ў кавярню быў вадаспад у пятніцу".
See video here: https://vimeo.com/280333352
Учора персанал кавярні ўжо быў гатовы да нечаканасцяў. На ўваходзе пабудавалі барыкаду са сметніц. Вада не прайшла.
See video here: https://vimeo.com/280333189
Уладальнікі кавярні кажуць, што рамонт пашкоджанага кухоннага абсталявання пакрые страхоўка. Яны не плануюць патрабаваць кампенсацыі ад "Мінскай спадчыны" — установы, якая замаўляла рэканструкцыю на вуліцах Рэвалюцыйная і Камсамольская. Праз паводку грунт на толькі што адрамантаванай вуліцы Рэвалюцыйнай вымываецца. Утвараюцца ямы.
Nail bar "Сороки" 16 ліпеня таксама пацярпеў ад паводкі. Вады ў салоне было па костачку. "Сороки" адкрыліся ў гэтым годзе і аказаліся не гатовыя да водных працэдур. Па суседстве з імі размешчаны яшчэ адзін іх салон, "Ноготки", які тут ужо тры гады. На памяці адміністратара такіх патопаў тут ніколі не было.
Уладальніца салона "Сороки" Ксенія Фёдарава ўжо закупілася мяшкамі з пяском і плануе набыць ружовага фламінга на выпадак новых затапленняў:
Уладальнікі іншых устаноў выстаўляюць барыкады з мяшкоў з пяском і рыхтуюцца да чарговых затапленняў.
Рэканструкцыя вуліц Камсамольская і Рэвалюцыйная каштавала гарадскому бюджэту каля 2,3 млн рублёў і выклікала шмат пытанняў у гараджан.
See video here: https://vimeo.com/280332963