Выратавальная станцыя "Камсамольскае возера" / Еўрарадыё
8 ратавальнікаў мінскага АСВОДа былі затрыманыя 6 верасня пасля Маршу адзінства. Яны выцягвалі з Камсамольскага возера людзей, якія скакалі ў ваду, ратуючыся ад пераследу АМАПа, і перавозілі на другі бераг, выдавалі пледы і дапамагалі сагрэцца.
Неўзабаве міліцыя прыйшла па саміх ратавальнікаў.
На станцыі днём панядзелка пуставата. У калідорах чуваць тэлефонныя званкі: звоняць журналісты і занепакоеныя людзі.
— Так, нашы супрацоўнікі ўчора даставалі людзей з вады, проста аказвалі людзям дапамогу. Іх няма цяпер на працы. Я не ведаю, дзе яны знаходзяцца, — сустракае карэспандэнта Еўрарадыё "тэхнічны супрацоўнік". — Павезлі спачатку ў РУУС, але цяпер яны на Акрэсціна. Я дакладна не скажу, вось там на другім паверсе знаходзіцца кіраўніцтва, схадзіце туды.
Кіраўніцтва на месцы няма, кажуць супрацоўнікі, якія засталіся незатрыманыя. Што рабіць, куды тэлефанаваць, з кім пагаварыць — яны не ведаюць:
— Для нас саміх раніца пачалася нечакана.
— Але шэсць ратавальнікаў не выйшлі сёння на працу, так?
— Ну, нават не шэсць, а восем. Уся ўчарашняя змена.
З кабінета на размову выходзіць мужчына, які, відаць, застаўся за старшага. Але ён таксама нічога не ведае.
— Вы ведаеце, кіраўніцтва на месцы цяпер няма. Яны паехалі ўдакладняць усё. Нельга сказаць, што яны затрыманыя. Іх забралі, каб яны далі тлумачэнні наконт учарашняга. Мы не ведаем, дзе яны, напэўна, у Цэнтральным РУУС.
— Але больш за тры гадзіны гэта ўжо не "даць каментары", а затрыманне.
— Ну, мы нічога не ведаем. Як толькі з'явіцца нейкая інфармацыя, мы з вамі звяжамся.
У ГУУС Мінгарвыканкама не далі інфармацыі пра месцазнаходжанне і статус супрацоўнікаў АСВОДа.
Па інфармацыі нашай крыніцы, ратавальнікі знаходзяцца цяпер у мінскім ізалятары на завулку Акрэсціна. Ім хочуць паставіць у віну артыкул 23.4 КаАП (супраціў законным патрабаванням супрацоўніка міліцыі). Па версіі міліцыянераў, ратавальнікі павінны былі перадаць тых, хто ўпаў у ваду, супрацоўнікам АМАПа, а не перапраўляць на другі бераг.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.