Студэнты БНТУ падчас эвакуацыі
Пажар у кемераўскім гандлёвым цэнтры «Зімовая вішня» стаў падставай праверыць, ці ўсюды выконваюцца правілы пажарнай бяспекі ў Беларусі. Ужо вядома, што продажы вогнетушыцеляў ў краіне за некалькі дзён выраслі ў два разы.
29 сакавіка разам з супрацоўнікамі МНС журналіст «Еўрарадыё» наведала адзін з карпусоў БНТУ на Партызанскім праспекце, 77.
Апоўдні. На пляцоўцы ля ўніверсітэта паліць некалькі студэнтаў. Увайшоўшы ў навучальную ўстанову, прадстаўнік МНС падыходзіць да вахцёркі і ветліва просіць націснуць кнопку экстранай эвакуацыі. Яна ў разгубленасці глядзіць на яго і з невялікім папрокам прамаўляе: «Ой, а так трэба было, можа, папярэдзіць...»
Начальнік сталічнага Заводскага раённага аддзела па надзвычайных сітуацыях Юрый Багданчык тлумачыць, маўляў да надзвычайных сітуацыях быць гатовымі трэба заўсёды.
Жанчына націскае кнопку і паралельна тэлефануе ў цэнтралізаваны пункт Сістэмы перадачы паведамленняў аб НС «Маланка», каб папярэдзіць, што эвакуацыя ў ВНУ — вучэбная. Інакш там вырашаць, што пажар рэальны, і будзе высланая тэхніка для тушэння.
На шчасце, мы толькі праводзім эксперымент. Некаторыя работнікі ВНУ гэта разумеюць і пачынаюць скардзіцца, што, маўляў адцягваюць ад навучальнага працэсу. Пакідаць памяшканне адмаўляюцца!
«Не, вы ўсё правільна робіце, — дзякуе нам пазней мясцовы электрык Мікалай Замаеў. — У нас аднойчы ўжо былі сур'ёзныя праблемы — гарэла праводка, прыязджалі з МНС. Праводка старая, старая сістэма без зазямляльнага провада, усюды алюміній. Будынак быў пабудаваны дзесьці ў 1964 годзе. Натуральна, ён патрабуе адмысловага абыходжання і насцярожанасці. З пераходам на камп’ютары нагрузка ўзрасла, праводка не вытрымлівае. Каб неяк уплываць на сітуацыю, мяняем лямпы на энергазберагальныя».
Суразмоўца распавядае, як адрэагаваў на раптоўную эвакуацыю. Перш за ўсё пайшоў і праверыў, ці ўсё чайнікі і абагравальнікі выключаныя. Калі своечасова не заўважыць, можа адбыцца няшчасце.
Варта адзначыць, што выходзілі людзі ў асноўным з галоўнага выхаду. Хутчэй за ўсё, таму што вестка пра тое, што эвакуацыя вучэбная, хутка разнеслася сярод навучэнцаў і ніхто асабліва не перажываў. Мы ж прайшліся па корпусе і выявілі: з трох эвакуацыйных выхадаў адзін зачынены. Мала таго, пад лесвіцай побач з ім — цэлы склад будаўнічага матэрыялу, мяшкоў, нейкіх кавалкаў дрэва і пакрытых фарбай дзвярэй.
«Пад лесвіцай складзіравана гаручая загрузка, што недапушчальна, — абураецца Юрый Багданчык. — Калі здарыцца загаранне, дым распаўсюдзіцца па ўсім лесвічным стаяку ўверх, пойдзе па калідорах — і людзі не змогуць эвакуявацца з-за гэтага. Грубае парушэнне!»
Падводзячы вынікі вучэбнай праверкі, прадстаўнік МНС кажа: «Працэс эвакуацыі быў не да канца правільным. Людзі пакідалі будынак больш за дзесяць хвілін. На жаль, многія выказваюць незадаволенасць, маўляў мы парушаем навучальны працэс. Гэта праводзіцца, каб людзі ведалі, куды ісці, як ісці і як дзейнічаць. Тым больш, што падчас праверкі выявілі парушэнні. Перакрываць выхады гаручымі матэрыяламі небяспечна. У дадатак, выхад быў зачынены».
Калі вучэбная эвакуацыя скончылася, а студэнты і выкладчыкі разышліся па аўдыторыях, я вярнулася да зачыненага выхаду, каб зрабіць пару здымкаў. На калідоры мяне падлавіў столяр, які прадставіўся Уладзімірам Мартынавым.
«Ведаеце, ідзе рамонт у нас. Мы ўсё часова паклалі сюды, — спрабуе апраўдвацца ён, паказваючы на склад пад лесвіцай. — Пажарная дзверы, дарэчы, былі адчынены. Тут проста кручок, які любы можа падысці і адкрыць».
Гледзячы на велізарны ржавы крук, пра існаванне якога мы не падазравалі, калі спрабавалі адчыніць дзверы падчас праверкі, я спытала, як будзе рэагаваць мой суразмоўца на заўвагі МНС.
Як ні дзіўна, ніяк: «Ды мы проста не вынеслі яшчэ гэтыя матэрыялы, у мяне ў кабінеце рамонт, скончыцца — прыбярэм. А цяпер куды — на вуліцу? Там жа яшчэ дождж, снег — хіба можна?»
«З намі спрабуюць спрачацца, пераконваць у тым, што парушэнняў няма, — наракае афіцыйны прадстаўнік Мінскага гарадскога ўпраўлення МНС Вольга Мельчанка. — Аднак, лесвічную клетку і эвакуацыйны выхад нельга загрувашчваць гаручымі матэрыяламі, якія перашкаджаюць выхаду. Дзверы, якія ляжаць пад лесвіцай, пакрытыя фарбай і лакам, гэта таксічныя прадукты. Пры гарэнні яны будуць вылучаць таксічныя рэчывы і задымлять будынак. Людзям прыйдзецца шукаць выхад. А выхад проста зачынены!»