“Вырай калыша хмары”: гурт Prypiać выпусціў новы сінгл. Паслухайце і вы!

Чытаць болей: Пра што спявае 17-гадовы беларус, які стварыў гурт з вядомымі музыкамі

Для Цімафея “Калыханка” — гэта гісторыя пра надзею чалавека калі-небудзь вярнуцца дадому і знайсці што-небудзь ад таго “жыцця да”, ад якога засталіся толькі разваліны, але якое ён панёс з сабой.

— Гэта песня пра тое, як мы працягваем несці ў сабе горад, якога больш няма. Пра тое, што нясём з сабой свой ранейшы свет — і, можа быць, аднойчы прынясём яго назад.

Гэта асацыяцыя з “Горадам Сонца” Тамаза Кампанелы, таму што ў кожнага з нас гэты “горад сонца” можа быць сваім: у нас гэта Беларусь да нашага ад’езду, нашыя дом, двор, вуліца, бацькі, сябры, мова, клубы, музыка, адчуванне будучыні — проста тое жыццё, якое ты лічыў нармальным і якое раптам скончылася.

І дамы стаяць на тым самым месцы, але гэты горад як быццам згарэў! Але самае важнае: ён не знік цалкам. Ён існуе ўнутры нас. І таму мы самі становімся носьбітамі страчанага горада.

Паводле Дзяніса Тарасенкі, “Калыханка” перадае атмасферу вуліц і дамоў, настрою людзей у Беларусі цягам трыццаці з лішнім гадоў.

— У тэксце атмасфера прыгнечанасці, безвыходнасці, у якой толькі і застаецца, што хадзіць з боку ў бок са сваімі манаткамі, як у той песні. І хаця мы жывём зараз у іншай рэчаіснасці, у іншай краіне, у Беларусі, як заўжды, да лепшага нічога не змяняецца. Тое ж панаванне камунальшчыкаў і жэтонаў. Гэтая песня магла б быць актуальнай і 15, і 25 гадоў таму, актуальная яна і цяпер.