Паўднёвакарэйскую пяцівалентную вакцыну “Эўпента”, вакол якой у жніўні разгарэўся скандал са смерцю дзіцяці, працягваюць выкарыстоўваць у беларускіх паліклініках. Абвестку пра гэта заўважылі ў віцебскай дзіцячай паліклініцы №2.
13 жніўня ў Ганцавіцкай бальніцы пасля планавых прышчэпак памёр двухмесячны хлопчык. Яму ўвялі два прэпараты: "Эўпента" і "Імавакс Поліа". Пасля ўколу хлопчыку стала кепска, медыкі не змаглі яго выратаваць.
Як потым стала вядома, хлопчык памёр ад анафілактычнага шоку. Міністэрства аховы здароўя тады заявіла, што да правядзення ўсіх неабходных праверак перапыняе ўжыванне адной серыі “Эўпенты”.
На брыфінгу 29 жніўня, неўзабаве пасля інцыдэнту з гібеллю дзіцяці ў Ганцавіцкім раёне, намеснік дырэктара Цэнтра экспертыз і выпрабаванняў у ахове здароўя Сяргей Марчанка сказаў: "Вакцына "Эўпента" праходзіць працэдуру рэгістрацыі, але яе можна выкарыстоўваць".
У рэестры лекавых сродкаў Беларусі “Эўпента” да гэтага часу не з'явілася.