Дрон у небе / LRT
Афіцыйны прадстаўнік МЗС Украіны Георгій Ціхі прынёс выбачэнні Літве з-за інцыдэнту, падчас якога ўкраінскі дрон трапіў у літоўскую паветраную прастору. Пра гэта гаворыцца ў яго пасце ў сацсетках.
У ноч на нядзелю ўлады Літвы абвясцілі паветраную трывогу ў двух рэгіёнах. Жыхары атрымалі на мабільныя тэлефоны паведамленні з рэкамендацыяй перайсці ў сховішчы. Пазней улады Літвы паведамілі, што ў паветраную прастору краіны залецеў і ўзарваўся дрон.
"Мы шкадуем пра інцыдэнт, які сёння раніцай адбыўся ў літоўскай паветранай прасторы", — напісаў Ціхі.
Па яго словах, прычынай маглі стаць расійскія сродкі радыёэлектроннай барацьбы, якія змянілі курс дронаў падчас аперацыі супраць "легітымных ваенных мэтаў" у Расіі.
Ціхі таксама заявіў: "Мы прыносім выбачэнні за ўсе нязручнасці, рызыкі і асцярогі, якія гэта магло выклікаць".
Ён падзякаваў Літве за падтрымку Украіны ў супрацьдзеянні расійскай агрэсіі, якая, па яго словах, з'яўляецца "карэннай прычынай пагроз бяспецы ў нашым рэгіёне".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут