Разбураны дом у Белгарадзе / @vvgladkov
Тры чалавекі загінулі ў расійскім Белгарадзе ў выніку падзення беспілотніка на жылыя дамы. Пра гэта паведаміў губернатар Белгародскай вобласці Вячаслаў Гладкоў. Паводле яго слоў, быў выбух, у выніку якога "было фактычна знішчана два жылыя дамы і пашкоджана некалькі жылых дамоў і аўтамабіляў". Сярод загінулых ёсць дзіця. Яшчэ два чалавекі, па словах Гладкова, знаходзяцца ў вельмі цяжкім стане ў рэанімацыі.
Пацярпелыя ёсць і ў Адэскай вобласці, якую амаль штодня атакуе Расія. Мінулай ноччу над вобласцю знішчылі 10 беспілотнікаў. У Ізмаільскім раёне пашкоджана прыпартовая інфраструктура і жылыя дамы. Былі пажары, распавёў кіраўнік Адэскай абласной ваеннай адміністрацыі Алег Кіпер. Паводле яго слоў, у выніку абстрэлу пацярпела сталая жанчына (1935 года нараджэння). У яе тэрмічныя апёкі, цяпер яна знаходзіцца ў бальніцы.
Усяго ж мінулай ноччу расіяне запусцілі па Украіне 33 ударныя беспілотнікі. Украінская супрацьпаветраная абарона збіла 28. Вайну, нагадаем, пачала Расія. 24 лютага 2022 года яна напала на Украіну.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут