У двары аднаго са шматпавярховых дамоў на праспекце Дзяржынскага ў Мінску знайшлі цела чалавека, які зваліўся з вышыні. Як паведамляе афіцыйная прадстаўніца Следчага камітэта Юлія Ганчарова, гэта быў дырэктар "Кінавідэапракату" Юрый Чачукевіч.
"Упраўленнем следчага камітэта па Мінску праводзіцца праверка па факце смерці мужчыны, цела якога сёння раніцай было выяўлена ў двары дома на праспекце Дзяржынскага з прыкметамі падзення з вышыні. Зараз працягваецца агляд месца здарэння сумесна з супрацоўнікамі ГУУС і Упраўлення ГКСЭ па Мінску. Асоба загінулага ўсталяваная, ім з'яўляецца Юрый Чачукевіч", — заявіла Ганчарова.
Цела мужчыны знайшлі каля дома, ніжнія паверхі якога займаюць офісы, а вышэй размяшчаюцца жылыя кватэры.
Па словах відавочцы, здарэнне адбылося зранку паміж 9.40 і 9.45. Відавочца пачуў выкрык і ўдар аб зямлю. Цела ляжала на адлегласці метраў пяці ад дома, нідзе ў пад'ездзе не было адкрытага вакна. Чачукевіч быў апрануты ў штаны і пінжак. Чаравікі ляжалі ўбаку ад цела, адзенне на ім было разарванае, праз яго была бачная бялізна. Адзін хлопец падыйшоў і сказаў, што на сцяне паміж шостым і сёмым паверхамі бачны след крыві.
Лекар "хуткай", якая прыбыла на месца здарэння, знайшоў каля цела ключы і перадаў іх міліцыянту. Электронны ключ адчыніў дзверы пад'езда — гэта можа значыць, што чалавек, які зваліўся з вышыні, жыў у гэтым пад'ездзе.
Юрый Чачукевіч быў прызначаны гендырэктарам УП "Кінавідэапракат" Мінгарвыканкама ў снежні 2016 года. Ён дэпутат Мінгарсавета. Раней быў першым сакратаром Мінскага гарадскога камітэта Беларускага рэспубліканскага саюза моладзі (БРСМ).
Яму было 35 гадоў, не жанаты, дзяцей няма.