Увечары 20 чэрвеня ў Капыльскім раёне Міншчыны здарылася аўтааварыя са смяротным вынікам: загінулі тры чалавекі.
Як паведамляе прэс-служба УУС Мінскага аблвыканкама, ДТЗ адбылося на 13-м км аўтадарогі Капыль-Нясвіж. У аўтамабілі "Фальксваген Пасат" ехалі тры чалавекі. На закругленні дарогі кіроўца не справіўся з кіраваннем. Аўтамабіль занесла і выкінула на ўзбочыну дарогі. Там машына ўрэзалася ў прыдарожнае дрэва. Пры аўтааварыі на месцы загінулі 41-гадовы кіроўца, 41-гадовы пасажыр і 40-гадовая пасажырка.
Паводле папярэдняй інфармацыі, ні кіроўца, ні пасажыры не былі прышпіленыя рамянямі бяспекі. ДАІ Мінскай вобласці адзначае, што мужчына за рулём не меў пасведчання кіроўцы (быў пазбаўлены да 2019 года).