Белы дом / pexels.com
Ахова Белага дома ў Вашынгтоне знайшла невядомы парашок, і апарат прэзідэнта ЗША тэрмінова эвакуявалі. Здарэнне адбылося ў нядзелю, 2 ліпеня, перадае Бі-Бі-Сі.
Прэс-сакратар сакрэтнай службы ЗША Энтані Гульельмі кажа, што парашок знайшлі а дзявятай гадзіне вечара. Пасля гэтага Белы дом быў зачынены ў якасці меры засцярогі.
Незвычайную знаходку выявілі ў Заходнім крыле Белага дома. Там размяшчаюцца Авальны кабінет — працоўны кабінет прэзідэнта, а таксама офісы віцэ-прэзідэнта, кіраўніка апарата Белага дома, прэс-сакратара адміністрацыі ды кабінеты соцень іншых супрацоўнікаў.
Прэзідэнта Джо Байдэна ў гэты дзень у Белым доме не было — ён знаходзіўся ў рэзідэнцыі Кэмп-Дэвід.
Ахова прэзідэнта ЗША адразу ж выклікала ратавальнікаў. Тыя неўзабаве вызначылі, што знойдзенае рэчыва не з'яўляецца небяспечным.
Але парашок адправілі на дадатковы аналіз, і выявілася, што гэта какаін.
Цяпер ідзе расследаванне, якім чынам парашок трапіў у Белы дом.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут