Старшыню Аб'яднанай грамадзянскай партыі Мікалая Казлова будуць судзіць за адмову даваць сведчанні супраць сябе. Такі вынік яго паходаў на допыты ў Следчы камітэт.
Экс-падпалкоўніка міліцыі Казлова тройчы выклікалі па крымінальнай "справе Каардынацыйнай рады" — 30 снежня, 5 і 12 студзеня. Кожны раз, як піша "Наша Ніва", апазіцыйны палітык адмаўляўся даваць паказанні, спасылаючыся на артыкул 27 Канстытуцыі — нікога нельга прымусіць даваць паказанні супраць самога сябе. Таксама ён адмовіўся падпісваць абавязальніцтва аб неразгалошванні.
"Допыты праходзяць з адзінай мэтай, каб наторгаць нейкіх цытат, а з іх зляпіць абвінавачванне", — мяркуе Казлоў.
Урэшце на допыт 12 студзеня прыйшоў участковы Партызанскага раёна Мінска. Ён забраў старшыню АГП і яго адваката ў апорны пункт міліцыі ды склаў адміністрацыйны пратакол за непадпарадкаванне. Так участковы ацаніў адмову даваць сведчанні.
Суд над Казловым прызначаны на 11:00 15 студзеня. Яму пагражае штраф або 15 сутак зняволення.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.