“Спужаліся Каржа!”. Фільм пра фанатаў беларускага рэпера знялі з праграмы кінафестываля

Дакументальны фільм “Дзвіж” (Dvizh), прысвечаны фанатам беларускага спевака Макса Каржа, дадалі ў праграму ўплывовага польскага кінафестывалю дакументальнага кіно Millenium Docs Against Gravity (MDAG). А пасля фільм “знік” з праграмы фэсту.

Гэта журналісту Еўрарадыё распавяла ананімная крыніца. Яна патлумачыла, што арганізатары “спалохаліся магчымага скандалу — і знялі стужку з паказу”. Цяпер нібы стваральнікі фільма шукаюць іншыя пляцоўкі для яго прэм’еры.

“Дзвіж” распавядзе пра фанатаў Каржа з розных краін  — беларуса, украінца і расіяніна — якія збіраюцца ехаць на варшаўскі канцэрт, які адбыўся 9 жніўня 2025 года.

Еўрарадыё звязалася з рэжысёрам праекта Аляксандрам Гарадко. Кінематаграфіст прызнаўся, што ў курсе сітуацыі, але пакуль ад дадатковых каментароў адмовіўся, патлумачыўшы занятасцю на здымках. 

Крыніца Еўрарадыё з атачэння MDAG патлумачыла адмову палітычным пытаннем. Нібы дырэкцыя фестывалю спачатку пагадзілася узяць фільм у праграму, планавалася паказаць яго ў Варшаве і Уроцлаве. 

А потым паглядзеўшы афіцыйны сайт спевака, дзе былі пазначаны тры канцэрты у Расіі, было вырашына фільм у праграму не браць. Магчыма, таму што фестываль займае акрэсленую праўкраінскую пазіцыю у вайне Расіі супраць Украіны, арганізатары вырашылі не нарывацца на скандал. 

“Спалохаліся Каржа!”, — рэзюмавала крыніца.

Еўрарадыё звярнулася ў дырэкцыю MDAG за афіцыйным каментаром, але пакуль яго не атрымала. Калі мы яго атрымаем, то працягнем гісторыю.

Негледзячы на тое, што “Дзвіж” не пакажуць, у праграме MDAG фігуруе другі беларускі фільм — стужка “Мы не створаны для палітыкі” Волі Чайкоўскай, рэжысёркі і арганізатаркі кінафестывалю “Паўночнае ззянне”. 

Праект распавядзе пра досвед беларускіх палітычных актывістак, у ліку якіх фігуруе лідарка дэмсілаў Святлана Ціханоўская. Прэм’ера фільма адбылася мінулым лістападам на 29-м фестывалі "Цёмныя ночы" ў Таліне.

Леташні варшаўскі канцэрт беларускага музыкі Макса Каржа, на якім сабралося больш за 80 тысяч фанатаў з розных краін, адзначыўся шэрагам хуліганскіх выхадак. Маладзёны сутыкнуліся з аховай стадыёна PGE Naradowy, а адзін з украінцаў разгарнуў падчас выступу флаг Украінскай паўстанцкай арміі (УПА), сімволіка якой у Польшчы забаронена. Праз гэта ўсё польскія ўлады вырашылі дэпартаваць з краіны 63 затрыманых удзельнікаў канцэрту: 57 украінцаў і шэсць беларусаў. Большасць з іх выехала самастойна, кагосьці прымусова выслалі, а адзінкі з пацярпелых падалі апеляцыю на рашэнне ўладаў. Сам Корж не стаў наўпрост каментаваць скандал і ўпісвацца за фанатаў.