Мікола Статкевіч і Марына Адамовіч / фота з старонкі Марыны Адамовіч на facebook.com
23 студзеня затрымалі Марыну Адамовіч — жонку экс-кандыдата ў прэзідэнты, палітвязня Мікалая Статкевіча. Гэта адбылося раніцай у аўторак.
Сёння па ўсёй Беларусі КДБ праводзіць ператрусы і затрыманні былых палітвязняў, а таксама сваякоў палітвязняў. Паводле інфармацыі праваабаронцаў, пад хапун трапілі мінімум 60 чалавек. Частку з іх затрымалі, а ў некаторых проста правялі ператрус і адпусцілі.
Паведамляецца, што затрыманні і ператрусы працягваюцца дагэтуль.
У пастановах супрацоўнікаў КДБ фігуруюць артыкулы за "фінансаванне экстрэмісцкай дзейнасці" і "ўдзел у экстрэмісцкіх фармаваннях". Самі кадэбісты казалі некаторым людзям, быццам затрыманні і ператрусы звязаныя з праектам "INeedHelpBY", які толькі што прызналі "экстрэмісцкім фармаваннем". "INeedHelpBY" — ініцыятыва па дапамозе пацярпелым.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут