Экстраны саміт ЕС ухваліў пагадненне аб Brexit. Цяпер праект пагаднення павінен прайсці праз брытанскі парламент. Як паведамляе ВВС, праект пагаднення рыхтаваўся амаль два гады, гэта дакумент на 585 старонак. У ім прапісаныя ўсе механізмы выхаду Вялікабрытаніі з Еўрасаюза.
Увесь пераходны перыяд пасля Brexit будзе доўжыцца да канца 2020 года і яго могуць працягнуць толькі адзін раз. Вялікабрытаніі давядзецца выконваць у гэты час усе свае абавязкі краіны ЕС і датрымлівацца ўсіх нормаў еўрапейскага рынку, аднак яна не будзе мець доступу да прыняцця рашэнняў у Еўрасаюзе.
Узгадненне дакумента ў парламенце Вялікабрытаніі можа быць складаным працэсам: супраць пагаднення настроеныя ўсе прадстаўнікі апазіцыі, а таксама дзясяткі дэпутатаў з Кансерватыўнай партыі, якая і без гэтага не мае большасці.
Калі парламент не прыме праект пагаднення, то яго ўнясуць на дапрацоўку ва ўрад краіны. Калі ж і новы план не будзе прыняты, варыянтаў развіцця падзеяў некалькі: выйсце з ЕС без пагаднення, новы рэферэндум, перамоўны працэс, або выбары новага парламента.
Прэм’ер-міністр Вялікабрытаніі Тэрэза Мэй звярнулася да сваіх суайчыннікаў з просьбай падтрымаць прыняцце дакумента, які “перагарне новую старонку ў жыцці краіны”.
Рэферэндум аб выхадзе з ЕС адбыўся ў Вялікабрытаніі ўвосень 2016 года. За выхад з саюза выказаліся 51,9% удзельнікаў галасавання. Меркавалася, што Злучанае Каралеўства пакіне ЕС у сакавіку 2019 года, аднак пазней дамовіліся аб падаўжэнні пераходнага перыяду. За гэты час настроі ў брытанскім грамадстве змяніліся і ўсё часцей гучаць заклікі застацца ў складзе Еўрасаюза.