1 чэрвеня на нарадзе ў Мінску Аляксандр Лукашэнка заявіў, што следства па справе расіянкі Сафіі Сапега, як і беларуса Рамана Пратасевіча, будзе праходзіць у нашай краіне. Раней прэс-сакратар прэзідэнта Расіі Дзмітрый Пяскоў не выключаў, што расійскі бок падыме пытанне аб яе пераводзе з Беларусі ў РФ. Па словах Лукашэнкі, на гэтую тэму ён з Уладзімірам Пуціным у Сочы патрацілі няшмат часу.
"Следства па абодвух персонах будзе праходзіць у Беларусі, — цытуе словы Аляксандра Лукашэнкі БЕЛТА. — Гэта непахісна. Пра гэта я сказаў прэзідэнту Расіі".
Па словах Лукашэнкі, ён запэўніў Пуціна, "што ніякіх не будзе пытанняў з доступам консулаў". "Па-мойму, яны не крыўдзяцца, мы не толькі даем інфармацыю, хочаце сустракацца — сустракайцеся", — дадаў ён.
Пратасевіч і Сапега былі затрыманыя ў мінскім аэрапорце 23 траўня пасля пасадкі пасажырскага самалёта Ryanair, які ляцеў з Афінаў у Вільню. Высветлілася, што ў Сафіі Сапега ёсць від на жыхарства ў Беларусі. Міністр замежных спраў Беларусі Уладзімір Макей раней выказаў меркаванне, што суд "хутчэй за ўсё, адбудзецца ў Беларусі".
Па даных "Бі-Бі-Сі", Сафію Сапега падазраюць у "парушэнні грамадскага парадку", "масавых беспарадках" а таксама ў "распальванні расавай, нацыянальнай, рэлігійнай альбо іншай сацыяльнай варожасці". Ёй пагражае да 15 гадоў зняволення. Сапега прызнаная палітзняволенай.
To see this content visit the full version of this page.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут