Рэдактара сайта “Виртуальный Брест” Андрэя Кухарчыка суд прызнаў вінаватым у "распаўсюдзе экстрэмісцкага матэрыялу". Яму прысудзілі штраф у 290 рублёў (10 базавых велічыняў) і пастанавілі канфіскаваць аргтэхніку, паведамляе прэс-служба БАЖ.
Нагодай стала публікацыя на сайце пра затрыманне жыхара Баранавічаў Уладзіміра Гундара. У якасці ілюстрацыі было фота Гундара ў кашулі з арнаментам. Прадстаўнікі ГУБАЗіК палічылі, што ў арнаменце ёсць свастыка і падалі матэрыялы ў суд.
16 чэрвеня суд Маскоўскага раёна Брэста прызнаў публікацыю на сайце экстрэмісцкім матэрыялам.
А праз некалькі тыдняў на Кухарчыка склалі новы пратакол — цяпер ужо за распаўсюд экстрэмісцкага матэрыялу. Прычым гаворка ішда ўсё пра тую ж публікацыю.
Пратакол некалькі разоў вярталі ў міліцыю на дапрацоўку. Урэшце 19 жніўня суд Маскоўскага раёна Брэста зноў прызнаў Кухарчыка вінаватым.
Дарэчы, з аргтэхнікай, якую суд пастанавіў канфіскаваць, могуць узнікнуць праблемы. Кухарчык на судзе паведаміў, што яе ў яго забралі яшчэ ў ліпені падчас ператрусу і дагэтуль не вярнулі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут