У ноч на 20 лістапада ў пункце пропуску "Беняконі" на мяжы з Літвой беларускія памежнікі выявілі парушальніцу дзяржаўнай мяжы, паведамляе прэс-служба Дзяржаўнага памежнага камітэта.
Адна з пасажырак "Опеля" падала памежнікам пашпарт грамадзянкі Расіі. Але выявілася, што дакумент ёй не належыць. Падчас разбіральніцтва жанчына прызналася, што ўзяла пашпарт зводнай сястры, якая мае права на пастаяннае пражыванне ў Вене. Менавіта ў Вену ехала і правапарушальніца, якая хацела застацца ў Еўрасаюзе на пастаяннае месца жыхарства.
На жанчыну пачалі адміністрацыйную справу за незаконнае перасячэнне мяжы. Яе змясцілі ў ізалятар часовага ўтрымання. Таксама на яе могуць пачаць крымінальную справу за выкарыстанне падробленых дакументаў.