Расіяне зноў атакавалі Кіеў ракетамі, ёсць загінулыя і параненыя

У ноч на 6 ліпеня расіяне зноў правялі масіраваны ракетны абстрэл Кіева. Па ўкраінскай сталіцы было выпушчана больш за 400 ракет і дронаў.

Па стане на 8-ю гадзіну раніцы (паводле мінскага часу) вядома пра 11 загінулых і 46 пацярпелых, з іх пяцёра — дзеці. Пра гэта піша hromadske.ua са спасылкай на кіраўніка Кіеўскай вобласці Цімура Ткачэнку.

У Падольскім раёне ракета пацэліла ў жылы дзевяціпавярховік і разбурыла яго з дзявятага па пяты паверх. Ратавальнікі вывелі з будынка 17 чалавек, яшчэ 28 — спусцілі з верхніх паверхаў з дапамогай аэралесвіцы. З верхніх паверхаў знялі трох жанчын і шасцярых дзяцей.

Працягваецца пошук пацярпелых у 21-павярховым жылым доме: там разбурэнні закранулі кватэры з другога па пяты паверх.

Агулам у Кіеве падчас начной атакі пашкоджанні і разбурэнні атрымалі не менш за 15 жылых дамоў.