Вярхоўная Рада Украіны звольніла Івана Баканава з пасады кіраўніка Службы бяспекі Украіны.
Напярэдадні з гэтай прапановай выступіў Уладзімір Зяленскі. Таксама ўкраінскі прэзідэнт анансаваў далейшыя чысткі ў СБУ: могуць быць звольненыя яшчэ 28 супрацоўнікаў.
На тг-канале СБУ апублікаваны апошні зварот Баканава. Ён піша, што мог бы даць гучную справаздачу пра дасягненні, але прытрымліваецца прынцыпу "рэальныя справы не маюць патрэбы ў славеснай дапамозе".
Напрыканцы звароту Баканаў заклікаў не забываць пра адзінства падчас вайны.
Перад тым Зяленскі заявіў пра шматлікія факты здрады і калабаранцтва ўкраінскіх сілавікоў. Па гэтых фактах была пачатая 651 крымінальная справа, а ў 198 справах ужо абвясцілі падазрэнні. Больш за 60 работнікаў органаў пракуратуры і СБУ, па словах украінскага прэзідэнта, засталіся на акупаванай тэрыторыі і працуюць супраць Украіны.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут