На пасяджэнні 26 чэрвеня ПАСЕ цалкам аднавіла паўнамоцтвы расійскай дэлегацыі. Пасля гэтага дэлегацыі Польшчы, Літвы, Латвіі, Славакіі, Эстоніі ды Грузіі падтрымалі дэмарш Украіны і пакінулі сесію. Як удакладняе Громадське са слоў сябра ўкраінскай дэлегацыі Леаніда Емца, яны адправіліся дадому для кансультацый са сваімі ўрадамі і парламентамі.
Дэлегацыі гэтых краін падпісалі разам з украінскай дэлегацыяй супольную заяву.
"Безумоўнае аднаўленне правоў расійскай дэлегацыі без выканання Расіяй аніводнага са шматлікіх патрабаванняў Асамблеі супярэчыць фундаментальным каштоўнасцям Савета Еўропы і яго статуту. Гэта няправільны сігнал для краіны, якая звяртаецца да ваеннай агрэсіі, атручвання людзей, парушэння правоў грамадзян і не падахвочвае, але спрабуе дэстабілізаваць дэмакратыю ва ўсёй Еўропе", — гаворыцца ў паведамленні.
Дэлегацыі названых краін падкрэсліваюць, што пасля вяртання расійскай дэлегацыі ў ПАСЕ яны "не маюць адказу для сваіх народаў, як Савет Еўропы будзе абараняць свае правы, калі ён больш зацікаўлены ў абароне агрэсара, а не ахвяраў агрэсіі і рэпрэсій".
Дэлегацыі лічаць, што будучыня ПАСЕ знаходзіцца пад пагрозай, бо Савет Еўропы губляе давер людзей.