Рыгор Кастусёў
17 красавіка былому старшыні Партыі БНФ Рыгору Кастусёву спаўняецца 67 гадоў. За кратамі ён сустракае ўжо свой чацвёрты дзень нараджэння. Ад пачатку 2024 года ён перабывае ў крытай турме ў Гродне.
За кратамі ў Кастусёва абвастрылася анкалагічная хвароба. Нядаўна палітвязню рабілі аналізы, і вынікі былі кепскімі.
"Яму рабілі аналіз крыві, дык паказнікі дрэнныя: у два разы павышаны бялок у крыві. Павялічаныя лімфавузлы. Таксама турбуе варыкоз на нагах", — расказвае у каментары Радыё "Свабода" ягоны зяць Дзмітрый Антончык.
На пачатку красавіка, як распавядала Еўрарадыё, сваякам Кастусёва стала вядома, што яму зрабілі аперацыю — вывелі катэтар з мачавога пузыра. Як кажа Антончык, аперацыя зняла небяспеку разрыву пузыра, але ўскладніла перабыванне палітвязня за кратамі.
У лістах да родных Кастусёў, па словах зяця, не любіць шмат пісаць пра здароўе, але працягвае пісаць вершы. Ён працытаваў адзін з вершаў:
"Вось прыслаў верш, прысвечаны сваёй роднай вёсцы Цяхцін:
Не забываю тых мясцін,
Што мне даюць натхненне, сілы,
Пад рэдкай назваю Цяхцін,
Ад нараджэння родны, мілы..."
У апошніх радках верша Кастусёў фактычна пакідае тэстамэнт на выпадак смерці ў вязніцы:
...Пад шэры камень. Толькі той,
Што ўзяты з родных мне мясцінаў.
І невялікаю плітой,
Дзе бачна, хто каго пакінуў.
Цяхцін — вёска ў Бялыніцкім раёне Магілёўшчыны, дзе Рыгор Кастусёў нарадзіўся, вырас і пачаў працоўную дзейнасьць.
Рыгора Кастусёва затрымалі па справе аб "спробе перавароту" разам з юрыстам Юрасём Зянковічам і палітолагам Аляксандрам Фядутам. Па абвінавачанні ў "змове з мэтай захопу ўлады" палітыка асудзілі на 10 гадоў пазбаўлення волі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут