Пакаталіся — і хопіць. У Мінску пачалі засыпаць пяском стыхійныя горкі

У Мінску камунальныя службы засыпаюць пяском стыхійныя горкі, якія пасля моцных снегападаў сталі месцамі катання на цюбінгах і санках.

Ужо апрацаваныя і прыведзеныя ў бяспечны стан наступныя горкі:

• на праспекце Машэрава (каля гасцініцы "Планета");
• каля Траецкага прадмесця;
• на вуліцы Мельнікайте ля мемарыяла "Яма";
• у Парку Перамогі;
• на вул. Новавіленская / Зацень.

Камунальныя службы нагадваюць, што многія стыхійныя горкі небяспечныя з-за блізкасці да праезнай часткі, дрэў, ліхтароў і іншых перашкод.

Менш чым за месяц у Мінску больш за сто чалавек атрымалі траўмы падчас катання на цюбінгах. З канца снежня медыцынская дапамога спатрэбілася 119 пацярпелым — 76 дзецям і 43 дарослым.