Навуковец, чыноўнікі і звычайныя людзі пра забарону штучных кветак у Беларусі

Чытаць болей: Гортензия, роза, барвинок: чем заменить пластиковые цветы на кладбище

У жніўні праект кодэкса павінны перадаць дэпутатам, затым яго разгледзяць у Палаце прадстаўнікоў, Савеце Рэспублікі і толькі пасля гэтага накіруюць на подпіс Аляксандру Лукашэнку.

Паводле слоў суразмоўніцы, прыняць дакумент могуць не раней за 2027 год. І ўжо пасля гэтага пачнецца праца над падзаконнымі актамі і пастановамі ўрада, дзе і з’явіцца канкрэтны пералік тавараў, якія могуць трапіць пад абмежаванні.

 Менавіта на гэтым этапе, адзначаюць у міністэрстве, грамадская падтрымка можа адыграць важную ролю.

Так што цяпер абмяркоўваецца не сама забарона штучных кветак, а магчымасць яе прадугледзець. Што ў выніку апынецца ў пераліку — пытанне адкрытае.

Тэма вытворчасці і продажу штучных кветак закранае бізнес і ўжо сфарміраваны рынак. На заўвагу пра тое, што гэта цэлая індустрыя, у міністэрстве адказваюць проста:

— Мы разумеем, з чым сутыкнёмся.

Пры гэтым суразмоўніца ўпэўнена, што абмежаванні могуць не толькі нешта забараняць, але і стымуляваць з’яўленне альтэрнатыў. У прыклад прыводзіцца гісторыя з адмовай ад аднаразовага пластыку ў беларускіх рэстаранах — калісьці гэтая ідэя таксама здавалася фантастычнай.

— Калі ўводзяцца нейкія абмежаванні, забароны, яны становяцца стымулам для развіцця іншых вытворчасцей.

У міністэрстве дапускаюць, што ў будучыні гаворка можа ісці не абавязкова пра поўную забарону ўсяго, што называюць штучнымі кветкамі, а, напрыклад, пра абмежаванні для вырабаў са складаных камбінаваных і таксічных матэрыялаў. І нагадваюць, што размова пра гэта даўно вядзецца не толькі сярод эколагаў.

— Нават царква заклікае. Там таксама лічаць, што няправільна, груба кажучы, несці смецце на могілкі, што правільна прыносіць жывыя кветкі, — падкрэслівае прадстаўніца ведамства.

Цікава, што раней ва ўпраўленні прававога забеспячэння Мінпрыроды, куды таксама звярнулася журналістка Еўрарадыё, адказалі, што грамадскае абмеркаванне праекта кодэкса ўжо адбылося і людзі нібыта больш не змогуць падтрымаць прапанаваныя ініцыятывы.

Аднак ва ўпраўленні рэгулявання абыходжання з камунальнымі адходамі супакойваюць: грамадскае абмеркаванне сапраўды было, але датычылася самога Экалагічнага кодэкса і дзвюх новых нормаў-механізмаў, а не канкрэтна забароны штучных кветак.

Ключавое абмеркаванне яшчэ наперадзе, калі пачнуць фарміраваць сам пералік тавараў.

— Вось тут і будзе ўжо важна, каб нас хтосьці падтрымаў, — падкрэсліваюць ва ўпраўленні рэгулявання абыходжання з камунальнымі адходамі Мінпрыроды.

Тут таксама дадаюць: з ініцыятывай забароны на вытворчасць і продаж кветак са шкодных матэрыялаў на дзяржаўным узроўні выступілі чыноўнікі. Але менавіта неабыякавыя беларусы, якія даўно падымаюць гэтую тэму і гатовы адмовіцца ад такой прадукцыі, могуць дапамагчы ўвасобіць гэтую ідэю ў рэальнасць.

Як рэагуюць беларусы?

Грамадскія абмеркаванні пераліку тавараў, якія могуць трапіць пад абмежаванні, адбудуцца не раней за 2027 год. Але ўжо сёння беларусы актыўна рэагуюць у сацсетках на ініцыятыву Мінпрыроды — забарону вытворчасці і продажу штучных кветак.

— Трэба забараніць не толькі штучныя кветкі, але і вянкі, — прапануе карыстальніца сацсеткі Threads. — Сёння была на могілках, на новай частцы, дзе свежыя пахаванні, — ад вянкоў у вачах мітусіцца. А ж яны зроблены з тых жа матэрыялаў, што і кветкі.

— Тры гады таму ў Бабруйску супольнасць экасяброў eco.bobr разам з інспекцыяй аховы навакольнага асяроддзя і прыроды ўзнялі пытанне пра шкоду ад пластыкавых кветак. Нам казалі, што ўсе нашы намаганні марныя, але мы працягвалі пісаць петыцыі аб забароне ў Мінпрыроды. Дзякуй усім, хто свядома адмовіўся ад смецця, каб зрабіць нашу зямлю чысцейшай і прыгажэйшай, — піша яшчэ адна беларуска.

— Нават калі апусціць тэму экалогіі, гэтыя кветкі выглядаюць страхотна…