Мінскі рэстаран “Бургер Кінг” чакае суд з нагоды парушэння закону ад мовах. Гэты прэцэдэнт здарыўся, калі мінчук Анатоль Новікаў зайшоў у рэстаран і звярнуўся да касіркі па-беларуску, а яна адказала, што не разумее яго.
Кліент папрасіў дапамагчы, але адміністратарка заявіла, што супрацоўнікі не абавязаныя ведаць беларускую мову. Пасля гэтага Новікаў пакінуў па-беларуску запіс у кнізе скаргаў і прапановаў, на які атрымаў рускамоўны адказ — гэта парушэнне закону аб зваротах грамадзян. Гэтую гісторыю Анатоль Новікаў распавёў у Фэйсбуку.
Абураны кліент не супакоіўся і напісаў скаргу ў Мінітэрства юстыцыі і ў Мінгарвыканкам. Яго зварот разгледзілі ў адміністрацыі Цэнтральнага раёна, з якой прыйшоў адказ па-беларуску: на кіраўніка рэстарана складзены пратакол аб адміністрацыйным парушэнні за стварэньне перашкод і абмежаванняў у карыстанні дзяржаўнай мовай. Справа перададзеная ў суд. Калі супрацоўніцу Burger King прызнаюць вінаватай, ёй пагражае штраф ад чатырох да дзесяці базавых велічынь (ад 92 да 230 рублёў).