Работнікі "Гродна Азот" каля прахадной 26 кастрычніка 2020 года / "Радыё Свабода"
Супрацоўнікі "Гродна Азот" 26 кастрычніка аднымі з першых паспрабавалі далучыцца да агульнанацыянальнай забастоўкі, абвешчанай Святланай Ціханоўскай. Частку работнікаў прадпрыемства-гіганта хутка забралі сілавікі.
Як гэта было, Еўрарадыё расказаў супрацоўнік "Гродна Азоту" Дзмітрый.
Калі Дзмітрый падыходзіў да прадпрыемства, каля прахадной ужо знаходзіліся супрацоўнікі АМАПа і аўтазакі. Каля ўвахода ў будынак да яго падбеглі сілавікі — схапілі і павялі ў аўтобус.
— Па дарозе да аўтобуса яны задавалі дзіўныя пытанні: "Колькі табе гадоў, старэнькі?", "Колькі зарабляеш?"
Затрыманых з "бусіка" Дзмітрыя адвялі ў актавую залу ўчастка, пасля чаго супрацоўніца РАУС пачала збіраць іх асабістыя звесткі. Потым па адным адводзілі ў кабінеты для складання пратаколаў.
— У кабінеце знаходзіліся я, малады супрацоўнік і двое з АМАПа. Малады супрацоўнік прыступіў да афармлення пратакола, у той час як двое з АМАПа, яны былі без масак, пачалі задаваць пытанні: "Здароў, стары, як маешся? Ну што, давай пагутарым? Гэта не допыт, але я люблю пагаварыць, так бы мовіць, выслухаць вашу ідэю... Дык за што ты змагаешся?" — успамінае "дыялог" супрацоўнік прадпрыемства.
Дзмітрый адмовіўся размаўляць з сілавікамі, але кажа, што яны працягвалі аказваць на яго ціск.
— Першы амапавец быў больш актыўны ў псіхалагічным ціску, нецэнзурна выказваўся ў мой адрас, рэзка ўставаў і ішоў на мяне, часам рэзкімі рухамі рукі на ўзроўні маёй галавы стукаў у сцяну, — расказвае Дзмітрый.
Супрацоўнік міліцыі ўвесь гэты час маўчаў і запаўняў дакументы. У нейкі момант амапаўцы сталі зачытваць навіны тэлеграм-канала "Нехта" і нецэнзурна выказвацца.
— Быў момант, калі першы амапавец дастаў з шафы сцяг бел-чырвона-белы. Сказаў: "Глядзі, якая ў мяне ёсць анучка добрая", пачаў дэманстратыўна нашароўваць сцягам свае берцы.
Сілавікі паказвалі Дзмітрыю відэа затрыманняў на пратэстах у іншых краінах. Дарэчы, гэтая тэма актыўна мусіруецца ў дзяржСМІ: маўляў, у Беларусі ўсё праходзіць "мякка", а на "гнілым Захадзе" ўсё куды больш строга.
Каментуючы відэа, яны казалі: "Ну вось, глядзі, як вас пі****ць трэба! Мала вас п*****ць!"
Пайшлі амапаўцы пасля таго, як па рацыі абвясцілі пра збор "другой групы".
Пасля адыходу амапаўцаў пратакол быў гатовы і Дзмітрыя пачалі вадзіць па іншых кабінетах. Там расказвалі пра магчымыя наступствы удзелу ў акцыях і забастоўках.
— Пасля гэтага мяне адвялі на першы паверх і, запісаўшы імя, прозвішча і імя па бацьку, адпусцілі, — расказаў ён.
Калі супрацоўнік "Гродна Азота" дайшоў да запраўкі, ён паглядзеў на час — у міліцыі Дзмітрый правёў амаль шэсць гадзін.
На працу вярнуўся не адразу: спачатку зайшоў у цэнтр мабільнага аператара, каб аднавіць сім-карту: папярэднюю забралі ў міліцыі і адмовіліся аддаваць. Потым вярнуўся на завод, але да працы так і не прыступіў.
— Я застаўся з іншымі работнікамі за прахадной, на тэрыторыі завода. Да 17:00. Але на сваё непасрэднае рабочае месца я не пайшоў. Дзесьці да 16:00 да нас прыйшоў прадстаўнік пракуратуры Гродзенскай вобласці і сказаў: паколькі нас шмат, ён хоча пагаварыць з трыма супрацоўнікамі.
Размова з пракурорам у калег Дзмітрыя не задалася: на ўсе пытанні ён адказваў "гэта не ў маёй кампетэнцыі".
Яшчэ ў міліцыі Дзмітрыя папярэдзілі, што яго чакае суд. Дата пакуль не прызначаная, да пасяджэння ён застаецца на свабодзе. На пытанне пра тое, ці будзе ён далей баставаць, супрацоўнік "Гродна Азота" адказаў: "Планую не змяняць сваім звычкам "курыць перад прахадной".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
To see this content visit the full version of this page.