Міністры замежных спраў Беларусі і Польшчы Уладзімір Макей і Вітальд Вашчыкоўскі не змаглі дамовіцца наконт акрэдытацыі тэлеканала "Белсат". Пра гэта польскі міністр паведаміў пасля перамоваў з Макеем.
Кіраўнік польскай дыпламатыі правёў перамовы з беларускім калегам у дзвюх частках. Пытанне "Белсата", які вяшчае з тэрыторыі Польшчы, абмяркоўвалася ў другой частцы перамоваў. Каментуючы вынік перамоваў, Вашчыкоўскі заявіў: "Мы гаварылі сёння пра дэмакратызацыю і пра тое, што СМІ павінны служыць свабодзе, а не выкарыстоўвацца ў інтарэсах палітыкаў".
Ужо сыходзячы ад журналістаў, на ўдакладняючае пытанне tut.by, ці атрымалася дасягнуць дамоўленасці наконт "Белсату", польскі міністр адказаў сцісла: "Не".
Таксама без аптымізму Вашчыкоўскі пракаментаваў сітуацыю з польскай меншасцю ў Беларусі. Па яго словах, не варта мець у гэтым пытанні "непатрэбныя спадзяванні".
Тэлеканал "Белсат" вяшчае з 2007 года праз спадарожнік на тэрыторыю Беларусі. Тэлеканал тройчы спрабаваў атрымаць акрэдытацыю пры МЗС, але заўжды атрымоўваў адмову. Чацвёртую спробу рэгістрацыі тэлеканал зрабіў акурат 21 сакавіка.