Крама symbal.by заплаціць штрафы, прысуджаныя яе наведнікам, заявіў яе дырэктар Павел Белавус у сваім допісе ў Фэйсбуку.
Суды над наведнікамі крамы адбыліся 23 ліпеня ў Судзе Савецкага раёна. Белавус размясціў наступны допіс:
"Сёння ў судзе Савецкага раёна Мінска адбыліся суды над наведнікамі крамы symbal.by, якіх 23 чэрвеня АМАП забраў у аўтазак з чаргі.
Вось вынікі:
Ігар Сурынін — 4 базавыя велічыні (108 рублёў),
Ілля Дземчанка — 7 базавых велічынь (189 рублёў),
Рафік Кенгерлі — 4 базавыя велічыні (108 рублёў),
Аляксандр Кузняцоў — 4 базавыя велічыні (108 рублёў),
Аляксандр Паплаўскі — 4 базавыя велічыні (108 рублёў),
Уладзіслаў Кавалёў — 4 базавыя велічыні (108 рублёў),
Аляксандр Райчонак — судовае пасяджэнне перанесена на 29 ліпеня ў 09:30,
Аляксандр Галубкоў — судовае пасяджэнне перанесена на 29 ліпеня ў 10:00,
Анастасія Лобан — судовае пасяджэнне перанесена на 29 ліпеня ў 10:00.
Нашая крама кампенсуе штрафы ўсім гэтым асуджаным людзям!"
Ён адзначыў, што на ўсіх наведнікаў крамы склалі аднолькавыя пратаколы за парушэнне парадку арганізацыі або правядзення масавых мерапрыемстваў і непадпарадкаванне законнаму распараджэнню ці патрабаванню службовай асобы пры выкананні ім службовых паўнамоцтваў.
Як паведамлялася раней, на краму symbal.by сталі ціснуць улады пасля выпуску маек з надпісам "ПСІХОЗ%". Санстанцыя зачыніла цэх, дзе шылася прадукцыя symbal.by, патлумачыўшы гэтую меру пагрозай нацыянальнай бяспецы. Урэшце крама абвясціла пра закрыццё і распродаж тавару. Але чаргу пакупнікоў, якія прыйшлі набыць сае тавар, разагналі амапаўцы, частку пакупнікоў затрымалі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.