Затрыманне Максіма Сільнікава / x.com/NCA_UK
У выніку міжнароднай аперацыі Вялікабрытанія арыштавала аднаго з самых вядомых рускамоўных кіберзлачынцаў у свеце. Аказалася, што гэта 38-гадовы беларус Максім Сільнікаў. Пра яго арышт паведамляе Нацыянальнае агенцтва па барацьбе са злачыннасцю Вялікабрытаніі (NCA).
Сільнікава і яго саўдзельнікаў называюць "элітнымі кіберзлачынцамі". Яны прымалі экстрэмальныя меры перасцярогі, каб іх не знайшлі заходнія спецслужбы. Сам Сільнікаў дзейнічаў пад псеўданімамі "J.P. Morgan", "xxx" і "lansky".
Брытанскія спецслужбы шукалі Сільнікава з 2015 года. Паралельна расследаванні таксама вялі Сакрэтная служба ЗША (USSS) і ФБР.
Паведамляецца, што арыштавалі Сільнікава яшчэ ў ліпені 2023 года ў іспанскім горадзе Эстэпона і адправілі ў Польшчу. Адтуль 9 жніўня 2024 года яго экстрадавалі ў ЗША для выстаўлення афіцыйных абвінавачванняў.
Паводле інфармацыі BELPOL, піша "Наша Ніва", Сільнікаў меў таксама грамадзянства Украіны. Ён у разводзе, мае двух дзяцей. Вучыўся ў гімназіі №5 Мінска, а пасля ў БНТУ. Потым працаваў у кампаніі "ТэхнаТрансВарыянт".
Спачатку Сільнікава абвясцілі ў вышук за ўхіленне ад прызыву. Беларусь ён пакінуў у 2013 годзе.
Брытанскія службы паведамляюць, што злачынную дзейнасць Сільнікаў пачаў мінімум у 2011-м. Ён з калегамі стварыў злачынны картэль Reveton, які рассылаў інтэрнэт-карыстальнікам лісты з віруснай праграмай ад імя праваахоўных органаў. Праграма Reveton магла таксама сфатаграфаваць карыстальніка праз вэб-камеру, каб суправадзіць апавяшчэнне патрабаваннем аплаты. Толькі ў ЗША з 2012 па 2014 год махляры вымагалі з дапамогай праграмы штомесяц каля 400 тысяч долараў. Агулам па ўсім свеце Сільнікаў з паплечнікамі скралі дзясяткі мільёнаў долараў.
Акрамя Сільнікава ў кіберзлачынствах у ЗША вінавацяць таксама 38-гадовага Уладзіміра Кадарыю з Беларусі і 33-гадовага Андрэя Тарасава з Расіі.
Кадарыю затрымалі ў Казахстане ў 2022 годзе і ў сакавіку 2023-га экстрадавалі ў Беларусь. Яго абаронцы ў Казахстане спрабавалі выдаць яго за беларускага апазіцыянера.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут