Грэцыя выступае за спрашчэнне візавага рэжыму краін ЕС для грамадзян Беларусі. Пра гэта ў эфіры тэлеканала "Беларусь 1" заявіў генеральны сакратар МЗС Грэцыі па міжнародных эканамічных адносінах Гіоргас Цыпрас.
"Грэцыя імкнецца быць адкрытай для ўсіх, хто хоча яе наведаць, асабліва для гасцей з такіх краін, як Расія ці Беларусь. На жаль, рэжым, які дае магчымасць наведвання краін Еўрасаюза, сёлета стаў стражэй замест таго, каб спрасціцца. Для Грэцыі гэта вельмі сур'ёзная праблема", — перадае БЕЛТА словы дыпламата.
Дарэчы, Цыпрас мяркуе, што пытанне візавага рэжыму не мае нічога агульнага з праблемай бежанцаў, бо тыя не атрымоўваюць візы.
Дыпламат паведаміў, што ва ўмовах эканамічнага крызісу Грэцыя скарачае свае дыпламатычныя прадстаўніцтвы за мяжой. Але ў Беларусі яна ўжо адкрыла ганаровае консульства, а ў 2016 годзе магчыма і пашырыць сваю дыпламатычную прысутнасць.
Фота: sauletta.by