Каго беларусы называюць героямі 2021 года? / калаж Улада Рубанава, Еўрарадыё
Канец года — час падводзіць вынікі. Важна ўспомніць не толькі пра падзеі, якія былі галоўнымі ў 2021-м, але і назваць яго герояў: тых, кім беларусы захапляліся, каго паважалі і ўспрымалі як прыклад.
Еўрарадыё запыталася ў сваіх падпісчыкаў пра тое, каго яны называюць героямі года, які ўжо адыходзіць. Расказваем, каго самі беларусы ў 2021-м называлі героямі часцей за ўсё.
Жонка палітвязня Ігара Лосіка — прыклад стойкасці і мужнасці. Пакуль судзілі яе мужа, Дар'я пастаянна прыязджала ў Гомель. У яе не было магчымасці ўбачыць Ігара, бо суд праходзіў у закрытым рэжыме. Але гэта не спыняла яе.
Дар'я вырашыла застацца ў Беларусі, каб быць побач з мужам. На гэта яе рашэнне не ўплывае і тое, што прыйсці могуць па яе.
Нават пасля суровага прысуду Ігару (15 гадоў турмы) Дар'я не здалася. Яна запісала моцны зварот да Лукашэнкі і заклікала яго сустрэцца з ёй. Адказу, зразумела, не атрымала. Сёння для многіх яна застаецца прыкладам любові і стойкасці.
Лідарку беларускай апазіцыі ўвесь год лаялі беларускія прапагандысты — значыць, яе дзейнасць іх раздражняла. І зразумела чаму, бо дасягненняў у Ціханоўскай за год нямала.
Святлана працягвала сустракацца з сусветнымі лідарамі з адной мэтай — каб міжнародны ціск на беларускі рэжым не слабеў, а станавіўся толькі мацнейшым. Многіх натхніла яе сустрэча з прэзідэнтам ЗША Джо Байдэнам, пасля якой той увёў новыя санкцыі супраць уладаў краіны.
Называлі Ціханоўскую героем года многія не толькі за палітычную дзейнасць, але і за тое, што яна працягвала аб'ядноўваць дэмакратычныя сілы, розныя ініцыятывы і дыяспары. А пасля прысуду мужу не зламалася і працягнула сваю працу.
Актывіста з Бярозаўкі Вітольда Ашурка затрымалі ў верасні 2020-га, пазней асудзілі на пяць гадоў калоніі за ўдзел у пратэстах. Нягледзячы на прысуд, Вітольд не быў зламаны.
"Я па-ранейшаму вольны адрозніваць чорнае ад белага і любіць сваю Айчыну Беларусь!" — пісаў ён з-за кратаў.
Убачыць свабодную Беларусь Вітольд не паспеў: у траўні ён загадкава памёр у шклоўскай калоніі. Па афіцыйнай версіі — ад спынення сэрца. Але яго гібель выклікала шмат пытанняў, а развітваліся з ім як з героем.
Беларуса Сяргея Савельева многія называлі героем года за тое, што ён перадаў праваабаронцам відэа катаванняў у расійскіх турмах.
Можа здацца, што гэта не датычыцца Беларусі. На самай справе пенітэнцыярныя сістэмы дзвюх краін падобныя. Акрамя таго, рызыкаваў жыццём дзеля праўды менавіта беларус, што натхніла вельмі многіх.
Сярод імёнаў, якія называлі нашы падпісчыкі, вельмі шмат палітвязняў — Марыя Калеснікава, Раман Пратасевіч, Вольга Такарчук, Арцём Баярскі, Паліна Шарэнда-Панасюк, Сяргей Ціханоўскі, Віктар Бабарыка, — а таксама тых, хто адбывае пакаранне, але не прызнаны на сёння палітвязнямі.
Героямі года можна назваць кожнага з сотняў затрыманых, арыштаваных і асуджаных беларусаў. Нягледзячы ні на што, яны захоўваюць веру ў лепшае і паказваюць прыклад таго, што не апускаць рукі можна нават знаходзячыся ў зняволенні.
Натхняюць і родныя палітвязняў: сваёй сілай і любоўю. Еўрарадыё на працягу года выпусціла два праекты, прысвечаныя ім: "Палітвязні. Love Story" і "Рэжым чакання".
Яшчэ адзін "калектыўны герой" — медыцынскія работнікі. Гэта і лекары, і медсёстры, і санітары, і даследчыкі сферы медыцыны. Нягледзячы на ўсё, яны працягвалі ратаваць жыцці беларусаў і ад каранавіруса, і ад іншых захворванняў.
Іх праца і самаадданасць вельмі важныя і патрэбныя і таксама падаюць прыклад для многіх. Дзякуй медработнікам за ўсё, што яны робяць.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут