Вязень Мікалай Аўтуховіч, які трымае сухую галадоўку з 11 ліпеня, трапіў у карцар. Пра гэта піша ў сацсетках Святлана Богуш.
"Ён ужо моцна абязводжаны, перасохлі вусны і язык. У такой сітуацыі яго з пятніцы змясцілі ў карцар з нейкай фармальнай прычыны (як і Вольгу Маёраву), доктар да яго прыходзіў таксама ў пятніцу, але ніякіх аналізаў не рабілі. Скардзіцца на здароўе гэты ўпарты моцны чалавек катэгарычна адмаўляецца. Адзінае патрабаванне, якое Мікалай выставіў, каб спыніць галадоўку, — зняць абмежаванні на ліставанне. Умова цалкам выканальная, але адзіная рэакцыя на яе — лісты перасталі даходзіць нават маме", — піша яна.
Богуш прапаноўвае адпраўляць вязню ваду без газу, сокі, дзіцячыя фруктовыя пюрэ (у дой-паках), мёд (у пластыкавых пакунках). Гэтыя прадукты дапамогуць яму выходзіць з галадоўкі.
Суд над "групай Аўтуховіча" адбываецца ў Гродзенскай турме. Падсудных вінавацяць па шэрагу "тэрарыстычных" артыкулаў Крымінальнага кодэкса. Падчас суда галадоўку таксама трымаў палітвязень Уладзімір Гундар, але на мінулым тыдні спыніў яе.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут