Анджэй Пачобут у Варшаве / фота з яго старонкі ў Фэйсбуку
У аўторак, 8 верасня, у першай палове дня экс-палітвязень Анджэй Пачобут перасек польска-беларускую мяжу і накіраваўся ў бок роднага Гродна. Там ён плануе сустрэцца з сям'ёй і калегамі з Саюза палякаў Беларусі. Паездка працягнецца тыдзень, піша польскае выданне wyborcza.pl.
Паведамляецца, што яго ў паездцы суправаджае дачка.
Пра намер вярнуцца ў Беларусь Пачобут заяўляў з 28 красавіка — дня свайго выезду ў Польшчу. Калі яго абмянялі і вывезлі з Беларусі, экс-палітвязень настояў, каб яму аддалі пашпарт і дазволілі вяртанне на радзіму.
Пачобут меркаваў прыняць удзел у з'ездзе неафіцыйнага Саюза палякаў, прызначаным на верасень. З'езд быў перанесены, але актывіст вырашыў не адкладаць паездку ў Гродна.
Пасля паездкі ў Беларусь, як паведамляецца, Пачобут плануе адправіцца ў ЗША і Канаду, дзе сустрэнецца з палітыкамі і польскімі актывістамі. Вярнуўшыся ў Польшчу, ён хоча завяршыць кнігу, у якой расказвае пра сваё зняволенне.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут