Кіраўнік прэс-службы Дзярждэпартамента ЗША Нэд Прайс / Reuters
Дзярждэпартамэнт ЗША пракаментаваў ператрусы ў офісах няўрадавых арганізацый (НДА) Беларусі і затрыманні актывістаў.
"Мы далучаемся да нашых партнёраў у асуджэнні сённяшніх рэйдаў беларускіх уладаў, накіраваных супраць па меншай меры 19 грамадзянскіх, палітычных і адукацыйных НДА", — напісаў кіраўнік прэс-службы Дзярждэпартамента Нэд Прайс у Twitter.
Паводле яго слоў, "ясна, што ў Беларусі палітычны крызіс", і адзіным спосабам выйсці з яго з'яўляецца спыненне рэпрэсій і вызваленне ўсіх палітычных зняволеных.
Напярэдадні сілавікі прыйшлі з ператрусамі ў праваабарончыя і іншыя няўрадавыя арганізацыі ў Мінску і рэгіёнах. Ператрусы прайшлі ў офісах БАЖ, Беларускага Хельсінскага камітэта, лабараторыі "Новак", пазбаўленага рэгістрацыі праваабарончага цэнтра "Вясна" і яшчэ больш за дзесятак іншых арганізацый, а таксама дома ў актывістаў. Паводле звестак праваабаронцаў, былі затрыманыя больш за 10 чалавек, у тым ліку кіраўнік "Вясны" Алесь Бяляцкі.
У Брусэлі на гэтыя дзеянні беларускіх уладаў адрэагавалі папярэджаннем — "грубыя парушэнні правоў чалавека і свабод будуць мець наступствы", напісаў напярэдадні ў Twitter прэс-сакратар Еўрапейскай службы знешніх дзеянняў Петэр Стана.
На мінулым тыдні сілавікі прыходзілі з ператрусамі ў рэдакцыі незалежных СМІ і журналістаў. Тады прадстаўнік КДБ Канстанцін Бычак тлумачыў, што затрыманні праводзіліся ў рамках шырокамаштабнай аперацыі "па зачыстцы ад радыкальна настроеных асоб". Аляксандр Лукашэнка падчас сустрэчы з Уладзімірам Пуціным 13 ліпеня казаў пра НДА і "так званыя заходнія СМІ", па якіх "вельмі актыўна пачалі весці працу".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут