Нацыянальны рэгулятар — Дэпартамент па ядзернай і радыяцыйнай бяспецы МНС Беларусі (Дзяржатамнагляд) сёння апублікуе нацыянальную справаздачу па выніках стрэс-тэстаў для атамнай электрастанцыі ў Астраўцы.
Высновы Дзяржатамнагляду, як перадае БЕЛТА, даказваюць, што гэтая АЭС цалкам адпавядае самым высокім міжнародным стандартам бяспекі. Стандарты былі прынятыя пасля аварыі на АЭС Фукусіма ў 2011 годзе. Іх распрацавалі для гарантыяў бяспекі нават у выпадку, калі адмовяць асноўныя сістэмы або пры знешніх уздзеяннях.
Цяпер нацыянальную справаздачу перададуць Еўрапейскай групе па наглядзе ў сферы ядзернай бяспекі (ENSREG) і Еўракамісіі для міжнароднай экспертнай ацэнкі.
Начальнік Дзяржатамнагляду Вольга Лугоўская падкрэсліла важнасць бяспекі пры будаўніцтве і эксплуатацыі атамных электрастанцый: "Мы знаходзімся ў статусе краіны-пачаткоўца ў рэалізацыі ядзерна-энергетычнай праграмы. Для нас правядзенне працэдуры стрэс-тэстаў з'яўляецца не толькі надзейным інструментам праверкі і пацверджання бяспекі АЭС, але і кропкай росту ў дачыненні да развіцця тэхнічных кампетэнцый як рэгулюючага органа, так і арганізацый тэхнічнай падтрымкі, якія прымалі ўдзел у падрыхтоўцы нацыянальнай справаздачы".
Стрэс-тэсты прадугледжвалі найперш землятрусы і паводкі ў раёне АЭС. Разглядаліся нават такія экстрэмальныя ўмовы надвор'я, як павышэнне тэмпературы паветра да 50 градусаў паводле Цэльсія або смерч з хуткасцю да 62 метраў за секунду або нават пры камбінацыі гэтых дзвюх умоваў.