За суткі ў выніку абстрэлаў ў Луганскай вобласці пашкоджаны не менш за пяць дамоў / @luhanskaVTSA
Сітуацыя на фронце за мінулыя суткі істотна не змянілася. Расійскія войскі спрабуюць наступаць (без прыкметных поспехаў) альбо збіраюць сілы для наступу. Працягваюцца баі і абстрэлы ўкраінскіх гарадоў. Толькі ў Луганскай вобласці расійскія войскі 17 разоў атакавалі грамадзянскія аб'екты. Пашкоджаныя не менш за 5 дамоў, распавядае кіраўнік рэгіёну Сяргей Гайдай. Расіяне спрабуюць захапіць Папасную, за суткі горад перажыў "чатыры магутныя артылерыйскія атакі".
"Білі з усяго, што ў іх ёсць", кажа кіраўнік гарадской думы Папаснай Мікалай Ханатаў: і авіяцыяй, і артылерыяй. Людзі, па яго словы, апынуліся заблакаваныя ў падвалах.
За мінулыя суткі зноў вырасла колькасць загінуўшых на гэтай вайне дзяцей. Спіс папоўніўся імёны двух дзяцей з Лімана. Ад атрыманых раненняў памерлі 9-гадовая дзяўчынка і 14-гадовы хлопец, распавялі ў офісе Генеральнага пракурора Украіны. Усяго за час вайны ва Украіне загінулі 217 дзяцей, 391 атрымалі раненні.
За два месяцы расійскія войскі выкарысталі супраць Украіны звыш тысячы сто ракет і незлічоную колькасць авіябомбаў, артылерыі. Пра гэта гаварыў у традыцыйным звароце прэзідэнт Украіны Уладзімір Зяленскі.
Паводле ацэнкі сакратара Рады нацыянальнай бяспекі і абароны Украіны Аляксея Данілава, небяспека з боку Расіі можа пагражаць Малдове і Казахстану. Ён нагадаў пра словы міністра замежных спраў РФ Сяргея Лаўрова пра тое, што малдаване і казахі браты для расіян. "Таму ім трэба прыгатавацца, гэта можа быць пачатак такога "братання" на тэрыторыі Малдовы", — прыводзіць словы Данілава рэсурс "Громадське".
Украіна просіць адміністрацыю Джо Байдэна аб экстранай фінансавай дапамозе ў памеры 2 мільярды долараў у месяц. Пра гэта таксама распавядае "Громадське" са спасылкай на публікацыю ў The Washington Post.
Тым часам, дзяржсакратар ЗША Энтані Блінкен і міністр абароны ЗША Лойд Осцін пакінулі Кіеў — з'явіліся фота Блінкена ў вагоне цягніка. Падчас гэтага візіту, нагадаем, высокія госці паабяцалі Украіне ваенную дапамогу.
Жыхары Херсона плануюць сабраць мітынг супраць псеўдарэферэндума аб стварэнні так званай "ХНР", піша УНІАН. Акцыя адбудзецца ў дзень "рэферэндуму" — 27 красавіка. Людзі выступаюць супраць стварэння квазірэспублікі.
Таксама стала вядома, што ў Херсоне ў падвале мясцовай царквы больш за месяц хаваюцца 58 дзяцей-сірот і дзяцей, пазбаўленых бацькоўскай апекі. З іх 10 дзяцей ва ўзросце ад 4 месяцаў да года, астатнія – менш за 4 гады, у тым ліку дзеці з інваліднасцю, якія маюць патрэбу ў адмысловым даглядзе і лячэнні. Пра гэта распавяла ўпаўнаважаная Вярхоўнай Рады Украіны па правах чалавека Людміла Дзянісава і папрасіла аб дапамозе ў эвакуацыі дзяцей. Ужо знойдзены ўкраінскі дом дзіцяці, які гатовы іх прыняць, патрэбны гуманітарны калідор.
Футбалісты данецкага "Шахцёра" ўшанавалі памяць загінулай у Адэсе сям'і: трохмесячнай дзяўчынкі Кіры, яе мамы Валерыі і бабулі. Сям'я загінула ў суботу падчас расійскага ракетнага абстрэлу. Футбалісты "Шахцёра" выйшлі на дабрачынны матч у футболках з фота бэйджыка з радзільні. На гэтай бірцы былі звесткі пра маленькую Кіру. Акцыя была прысвечана ўсім загінулым у гэтую вайну украінскім дзецям.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут