Будаўніцтва акумулятарнага завода на ўскрайку Брэста будзе працягвацца. Распараджэнне старшыні Брэсцкага аблвыканкама Анатоля Ліса наконт прыпынення будаўніцтва страціла сілу, піша TUT.by са спасылкай на прэс-службу "Акумулятарнага Альянсу".
Гэта значыць, што акумулятарны завод зможа пачаць будаўніча-мантажныя і пусканаладачныя работы. Пра запуск вытворчасці пакуль што гаворка не ідзе, кажуць у прэс-службе кампаніі.
Брастаўчане больш за два гады змагаюцца з будаўніцтвам акумулятарнага завода: яны лічаць недапушчальным такое экалагічна шкоднае прадпрыемства каля самага горада. За гэты час завод змяніў уласніка: ад кампаніі "АйПаўэр" перайшоў ва ўласнасць "Акумулятарнага Альянсу". 25 жніўня кіраўніцтва завода звярнулася ў аблвыканкам з просьбай адмяніць распараджэнне аб прыпыненні будаўніцтва. Дырэктар "Акумулятарнага Альянсу" Дзмітрый Бутаў спасылаўся на тое, што завод атрымаў усе неабходныя дазволы ад дзяржаўнай экалагічнай і будаўнічай экспертыз, а таксама дазвол на выкіды.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.