Беларускія піяршчыкі хочуць уратаваць імідж Кейт Мідлтан

Чытаць болей: Кейт и Уильям поблагодарили общественность за понимание

Мы лічым, што наш досвед вельмі актуальны. Мы робім піяр. Мы прасоўваем розныя — не толькі беларускія — брэнды. Часцей за ўсё гэта стартапы, венчурныя фонды, акселератары. Мы гэта робім даўно, таму лічым, што наш досвед будзе цалкам рэлевантны і для каралеўскай сям'і.

Да таго як стварыць агенцтва ў Польшчы, Смірноў працаваў начальнікам аддзела карпаратыўных камунікацый velcom [цяпер А1. — Еўрарадыё]. Ён кажа, што "крызісы" ўзнікалі кожны дзень — можа, нават часцей, чым у палацы. Так што досвед працы з антыкрызісным піярам у агенцтва ёсць.

Што вы ведаеце пра каралеўскую сям'ю?

Але ці дастаткова быць спецыялістам у камунікацыі, каб працаваць з каралеўскай сям'ёй? Ці ёсць у агенцтве спецыялісты па каралеўскай сям'і?

— У нас у агенцтве ўсе спецыялісты па каралеўскай сям'і! — смяецца Смірноў. — Каралеўская сям'я вельмі часта фігуруе ў брытанскіх медыя, а мы часта публікуемся ў брытанскіх медыя, гэта адзін з нашых ключавых рынкаў. І так выйшла, што навіны пра каралеўскую сям'ю мы таксама адсочваем.

Ёсць такое паняцце — ньюсджэкінг. Ты прывязваешся да навіны і спрабуеш выкарыстоўваць яе як інфанагоду для прасоўвання свайго прадукту ці сваёй кампаніі. І паколькі мы часта чытаем каралеўскія навіны, часам мы спрабуем выкарыстоўваць іх і для прасоўвання прадуктаў на брытанскім рынку. Бо каралеўская сям'я для брытанцаў вельмі важная, і яны заўсёды сочаць за тым, што ў ёй адбываецца.

А гэта этычна? Кейт жа хварэе

Але ці можна выкарыстоўваць для ўласнага прасоўвання такія трагічныя навіны чужой, хай і каралеўскай, сям'і? Днямі прынцэса Кейт паведаміла, што ў яе анкалагічнае захворванне. А доўгая адсутнасць у медыяполі была звязаная з жаданнем прыватнасці ў такі цяжкі момант. У дадатак дарослым членам каралеўскай сям'і трэба было зразумець, якімі словамі расказаць пра хваробу дзецям Кейт і Уільяма.

Чытаць болей: Кейт Мідлтан расказала, што ў яе дыягнаставалі рак

— Мы, безумоўна, спачуваем прынцэсе Кейт і жадаем ёй хутчэйшага выздараўлення. І думаю, гэта не толькі наша эмоцыя. Думаю, тое самае адчуваюць яе прыхільнікі па ўсім свеце. Для мяне прынцэса Кейт заўсёды была і ёсць ідэалам прынцэсы. Напэўна, так і мусіць выглядаць, так і мусіць паводзіць сябе член каралеўскай сям'і. І я кажу пра ўсё: пачынаючы з таго, што яна ікона стылю, заканчваючы тым, які імідж склаўся ў яе ў медыя.

Думаю, у яе прыроджаная якасць — уменне стварыць такі вобраз, такое першае ўражанне, якое нават не трэба карэктаваць. У яе гэта вельмі добра атрымліваецца.

І я думаю, што, прайшоўшы праз свой цяперашні стан, Кейт стане яшчэ мацнейшай — як і брытанская манархія ў цэлым.

А калі мы як агенцтва можам нейкім чынам дапамагчы брытанскай кароне не трапляць у такія складаныя камунікацыйныя сітуацыі, то будзем рады аказаць дапамогу. Гэта не проста піяр, не проста хайп, а рэальная дапамога. А для нас, безумоўна, гэта быў бы добры і карысны досвед.

Што надзець у палац?

А калі піяр-студыю выберуць для наступнага этапу сумоўя... што надзець у палац? У офісе гэта ўжо абмяркоўваюць?

— Мы аддаём перавагу таму, каб не прымяраць на сябе чужы касцюм загадзя. Пакуль мы проста выказалі жаданне ўдзельнічаць у конкурсе і яшчэ не можам сказаць, што мы яго выйгралі.

Але калі палац прыме рашэнне, што мы праходзім у наступны этап адбору, ён, несумненна, і з уласцівай яму чапурыстасцю раскажа нам, у што трэба быць апранутымі і які пратакол выконваць.