Беларусь апусцілася ў рэйтынгу міралюбнасці на 19 радкоў / economicsandpeace.org
За год Беларусь апусцілася ў "Глабальным індэксе міралюбнасці" на 19 пазіцый. У выніку апынулася на 117 месцы са 163-х магчымых.
Гэты рэйтынг на працягу 15 гадоў складае Інстытута эканомікі і свету. Ён улічвае такія фактары, як узровень згуртаванасці грамадства, захаванне правоў чалавека, палітычная і эканамічная стабільнасць, колькасць зняволеных у турмах, узровень тэрарыстычнай пагрозы, абаронныя выдаткі і ўдзел той ці іншай краіны ў баявых дзеяннях.
Беларусь у гэтым годзе прадэманстравала адно з самых рэзкіх зніжэнняў ў рэйтынгу. Такія ж страты ў 19 пунктаў ёсць толькі ў Шры-Ланкі.
Аўтары даследавання патлумачылі, што на такое піке Беларусі паўплывалі чатыры фактары.
Гэта "пагаршэнне ўзроўню палітычнай стабільнасці, павелічэнне колькасці дэманстрацый з ужываннем сілы, узмацненне ўнутранага канфлікту і пагаршэнне адносін з іншымі краінамі", — цытуе ТАСС намесніка дырэктара па навукова-даследчай працы Томаса Моргана.
Беларусь апярэджвае ў "індэксе міралюбнасці" Расію, якую даследчыкі паставілі на 154-е месца. На такую пазіцыю паўплываў "высокі ўзровень мілітарызацыі Масквы".
Самай міралюбнай краінай свету, па версіі аўтараў праекта, з'яўляецца Ісландыя. Далей ідуць Новая Зеландыя, Данія, Партугалія і Славенія.
Горш за ўсё справы з міралюбнасцю у Афганістана. Гэтая краіна займае апошні 163 радок рэйтынгу.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут