Амбасадар Еўрапейскага саюза ў Беларусі Дырк Шубель заклікаў афіцыйны Мінск рухацца ў бок адмены смяротнага пакарання. Аб гэтым паведамляецца ў відэазвароце на старонцы прадстаўніцтва ЕС у рэспубліцы ў сацсетцы Facebook.
"Мы заклікаем Беларусь рухацца ў бок адмены смяротнага пакарання. Утварэнне ўсё большага вакууму справядлівасці і вяршэнства права ў краіне з'яўляецца дастатковай прычынай для ўвядзення мараторыя — прастора для самавольства і юрыдычных памылак велізарная", — сказаў амбасадар.
Прадстаўнік Еўрасаюзу нагадаў, што Беларусь застаецца адзінай краінай у Еўропе, якая ўжывае смяротнае пакаранне, у той час як ЕС цвёрда і недвухсэнсоўна выступае супраць гэтага "ў любы час і ва ўсіх абставінах".
Улады Беларусі заўсёды скупа паведамлялі аб пакараннях, аднак у апошні час гэта працэдура стала яшчэ больш сакрэтнай, мяркуе Шубель. Часта нават сем'ям беларускіх зняволеных не даюць даведацца, ці былі пакараныя іх асуджаныя на смерць сваякі, і калі так, то хто з іх жывы, а хто не.
Амбасадар Еўрапейскага саюза ў Беларусі адзначыў, што многія краіны свету ўжо адмовіліся ад вышэйшай меры пакарання, таму яно "павінна быць незваротна выдалена з сістэмы правасуддзя і беларускага грамадства".
Сусветны дзень супраць смяротнага пакарання адзначаецца 10 кастрычніка. Як паведамляла Еўрарадыё, напярэдадні Еўрасаюз і Савет Еўропы заклікалі Беларусь перайсці да адмены пакарання смерцю.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут